Sulmuesi i Real Madridit, Vinicius Jr, është shpallur futbollisti më i mirë i vitit 2024 nga FIFA, duke fituar çmimin prestigjioz “The Best”. Ceremonia është mbajtur të martën në kuadër të edicionit të nëntë të çmimeve të FIFA-s.
Ylli brazilian, i cili nuk ia kishte arritur ta fitonte Topin e Artë 2024 – trofe që i ishte dhënë mesfushorit të Manchester City, Rodri, ka triumfuar në këtë garë për shkak të një sezoni të jashtëzakonshëm me Real Madridin. Gjatë edicionit 2023-24, Vinicius Jr e ka ndihmuar skuadrën e tij të fitojë Champions League dhe La Ligën, duke u bërë lojtari i parë i Real Madridit që fiton këtë çmim që prej Luka Modric në vitin 2018.
