Kryetari i Lidhjes Demokratike të Kosovës (LDK), Lumir Abdixhiku, mbajti një mbrëmje plot energji dhe përkushtim me gratë e Forumit të Gruas në Prishtinë, ku shprehu vlerësimin e tij të thellë për rolin e grave në historinë dhe zhvillimin e Kosovës.
Në fjalimin e tij, Abdixhiku theksoi se gra të guximshme kanë qenë shtylla kryesore në rrugëtimin e Kosovës drejt lirisë, demokracisë dhe progresit.
“Gruaja kosovare ka guxuar të ëndërrojë gjithherë! Vet rruga jonë drejt lirisë është shtruar nga gratë që besuan se një e nesërme më e mirë ishte e mundur,” tha ai.
Abdixhiku shprehu krenarinë për angazhimin e LDK-së në rritjen e përfaqësimit të grave në politikë, duke theksuar se lista për zgjedhjet e 9 shkurtit do të përfshijë 38 gra kandidate për deputete. Në disa komuna si Prishtina, përfaqësimi i grave ka kaluar 50%, ndërsa në Han të Elezit, të gjitha kandidatët janë gra.
Ai e konsideroi këtë arritje si një moment historik për politikën në Kosovë dhe një shembull për të gjithë vendin.
“Nga suksesi juaj varen ëndrrat e mëdha të grave dhe vajzave që sot nuk kanë zë,” shtoi Abdixhiku duke theksuar rëndësinë e përfshirjes së grave në vendimmarrje për një Republikë më të drejtë dhe të barabartë.
Në përfundim, Abdixhiku u zotua se barazia gjinore do të jetë një prioritet i tij personal dhe institucional, duke thënë: “Ndryshimi sot është misioni ynë, sepse Republika jonë është vet ëndrra jonë.” /Kosovatimes/
