Trajneri i Manchester United, Ruben Amorim, ka shprehur dëshirën që sulmuesi Marcus Rashford të mbetet pjesë e skuadrës, pavarësisht se lojtari ka përmendur largimin nga “Old Trafford” për një sfidë të re.
Njëzet e shtatë vjeçari i lindur në Manchester, është produkt i akademisë së klubit dhe që nga debutimi i tij në vitin 2016 ka realizuar 138 gola në 426 ndeshje. Megjithatë, forma e tij ka rënë ndjeshëm gjatë tetëmbëdhjetë muajve të fundit, duke bërë që ai të humbasë vendin në Kombëtaren e Anglisë për Kampionatin Europian këtë verë.
Një nga momentet më të diskutueshme të këtij sezoni ka qenë vendimi i Amorim për ta lënë Rashford jashtë derbit kundër Manchester City. Kjo është pasuar nga një intervistë e Rashford me gazetarin britanik Henry Winter, ku lojtari ka shprehur gatishmërinë për t’i dhënë fund lidhjes së tij njëzet vjeçare me klubin.
Gjatë një konference për shtyp, Amorim është pyetur rreth situatës së Rashford.
“Jo, nuk kam folur ende me të”, ka thënë Amorim. “Dje ishte dita kur u dhashë pushim lojtarëve, por ai është lojtari ynë dhe është gati për ndeshjen e ardhshme”, ka thënë trajneri i ri i United.
I pyetur nëse dëshiron që Rashford të qëndrojë, Amorim e ka pohuar atë.
“Sigurisht, sepse një klub i tillë ka nevojë për talent të mëdhenj, dhe ai është një talent i madh. Ai thjesht duhet të luajë në nivelin më të lartë, dhe ky është fokusi im. Dua vetëm ta ndihmoj Marcus”, ka thënë tekniku portugez.
