Trajneri i Chelsea, Enzo Maresca, ka deklaruar se klubi mbështet plotësisht dhe beson te Mykhailo Mudryk, pasi futbollisti ukrainas është kontaktuar nga Federata Angleze e Futbollit për një rezultat të diskutueshëm pas një testi rutinë anti-doping.
Mudryk, i cili ishte transferuar te Chelsea në janar të vitit 2023, ka thënë të martën se ishte i brengosur pasi është njoftuar nga Federata për gjetjen.
Sulmuesi ukrainas, që këtë sezon ka pasur pak mundësi për të luajtur si titullar dhe është përdorur kryesisht si zëvendësues në Premier League, ka deklaruar se “nuk ka përdorur kurrë me vetëdije substanca të ndaluara”.
“Klubi, stafi teknik dhe të gjithë ata që janë pjesë e qendrës stërvitore e mbështesim dhe besojmë te Mykhailo”, ka thënë Maresca në konferencën për shtyp përpara ndeshjes së Conference League ndaj Shamrock Rovers të Irlandës. “Kur ndodhin gjëra të tilla, është e rëndësishme të mbështesim lojtarët në të gjitha aspektet. Mykhailo është lojtar i Chelsea, pjesë e skuadrës, dhe është detyra ime, ashtu si e klubit dhe shokëve të tij, të qëndrojmë pranë tij”.
