Kryesimi një vjeçar i Organizatës së Fondit të Ballkanit Perëndimor i takon Kosovës. Kështu u vendos në takimin e radhës së Këshillit të Zyrtarëve të Lartë të Fondit të Ballkanit Perëndimor që u mbajt për dy ditë radhazi në kryeqendrën shqiptare, Tiranë ku pjesëmarrës ishin përfaqësues të Ministrive të Jashtme të gjashtë shteteve të Ballkanit Perëndimor. Deri tash kryesimin e kësaj organizate e kishte Bosnje e Hercegovina.
Në këtë takim dyditorë Kosova u përfaqësua nga udhëheqësi i Divizionit për Rajon, Kenan Tora i cili shprehu vlerësimin për punën që është bërë në kuadër të organizatës gjatë këtij viti, por edhe nevojën që të bëhet më tepër për të avancuar qëndrueshmërinë institucionale të organizatës.
“Kosova e ka dëshmuar veten që është një partner i besueshëm në Bashkëpunimin Rajonal duke marrë pjesë aktive në mekanizmat rajonal, përfshirë në këtë rast edhe ËBF. Për Kosovën, vlerat, parimet dhe standardet evropiane duhet të jenë parimet udhëheqëse në Bashkëpunimin Rajonal, kurse objektivi final është integrimi në Bashkimin Evropian. Gjatë kryesimit të ËBF, Kosova do të angazhohet për të garantuar barazi mes anëtarëve, si dhe transparencë, llogaridhënie dhe efektivitet”, ka thënë Tora.
Fondi i Ballkanit Perëndimor është një organizatë ndërkombëtare e vendosur në Tiranë, Shqipëri, e themeluar nga qeveritë e Shqipërisë, Bosnjë dhe Hercegovinës, Kosovës, Maqedonisë së Veriut, Malit të Zi dhe Serbisë. Fondi është bërë funksional me 1 tetor 2017, pas përfundimit të procedurave të ratifikimit të Marrëveshjes për themelimin e tij nga të gjitha parlamentet e anëtarëve të tij.
