Tendencat për ta dëmtuar Llapin në ndeshjet e Superligës, sipas këtij klubi janë bërë shkak që skuadra nga Podujeva ta bojkotojë ceremoninë “Laureatët e Vitit 2024”, të organizuar nga Federata e Futbollit e Kosovës.
Klubi llapjan përmes një deklarate publike ka sqaruar arsyet bojkotimit.
“Për shkak të zhvillimeve dhe tendencave që dëmtojnë KF Llapin, kryesia e klubit ka vendosur të bojkotojë ceremoninë “Laureatët e Vitit 2024”. Ne besojmë se momentalisht nuk ekzistojnë kushtet e duhura për të qenë pjesë e aktiviteteve të organizuara nga Federata e Futbollit e Kosovës, për shkak të situatës aktuale në futbollin kosovar. Bojkoti ynë ndaj FFK-së do të vazhdojë deri në momentin kur ky institucion të ndërmarrë hapa konkretë për përmirësimin e situatës dhe funksionimit të futbollit në vendin tonë”, ka shkruar klubi nga Podujeva. /Kosovatimes/
