Sot u mbajt mbledhja konstituive e Bordit të Drejtorëve të KOSTT me përbërjen e re, të miratuar sipas vendimit të Kuvendit të Kosovës Nr. 3802. Bordi përbëhet nga Kryesuesi Gëzim Tosuni dhe anëtarët Lumnije Aliu, Rejhane Zylfijaj, Sead Mujovi dhe Kryeshefi Ekzekutiv Evetar Zeqiri.
Përveç të tjerave, në këtë mbledhje Evetar Zeqiri ka prezantuar të arriturat kryesore të KOSTT-it gjatë këtyre viteve, duke theksuar përmirësimin e performancës operacionale dhe forcimin e bashkëpunimit ndërkombëtar.
“Bordi i KOSTT, në bashkëpunim me menaxhmentin, synon përmbushjen e detyrimeve ligjore të përcaktuara nga Ligji për Energjinë dhe licenca e ZRrE, me fokus në mbikëqyrjen efektive, vendimmarrjen strategjike, rritjen e sigurisë së furnizimit, modernizimin e infrastrukturës dhe integrimin e suksesshëm në tregjet rajonale dhe evropiane të energjisë”, njofton KOSTT.
Gjithashtu, Bordi angazhohet për qeverisje të mirë, transparencë dhe përputhje me interesin publik, duke forcuar zhvillimin e qëndrueshëm të sistemit të energjisë elektrike në Kosovë. /Kosovatimes/
