Sulmi, i cili ndodhi të premten në mbrëmje, rezultoi me vdekjen e disa personave dhe plagosjen e shumë të tjerëve. Sipas rezultateve paraprake të hetimeve, i dyshuari ka vepruar në mënyrë të pavarur, por ende nuk janë zbardhur plotësisht motivet e këtij akti.
Ministria e Punëve të Brendshme njoftoi se një analizë e postimeve të të dyshuarit në rrjetet sociale tregon kundërshtimin e tij të hapur ndaj Islamit. Ai gjithashtu promovoi teori konspirative rreth planit të pretenduar të autoriteteve gjermane për të islamizuar Evropën, gjë që besohet se ka nxitur më tej veprimet e tij.
I dyshuari, i identifikuar si Taleb A., është me origjinë nga Arabia Saudite. Ai mbërriti në Gjermani në vitin 2006, ndërsa në vitin 2016 mori statusin e refugjatit. Ndonëse kundër tij në vitin 2022 për shkak të disa deklaratave u bë një kallëzim, autoritetet më pas arritën në përfundimin se ato nuk përbënin një kërcënim konkret, raporton “Der Spiegel”.
Taleb A.
Një nga fqinjët e tij e përshkroi atë në një deklaratë për transmetuesin publik gjerman MDR si një qytetar “plotësisht normal”. Sipas saj, Taleb A. ishte i tërhequr dhe i rezervuar dhe nuk shoqërohej shumë me fqinjët.
“E kam të vështirë ta besoj se ky njeri, të cilin e konsideroja një fqinj të zakonshëm, tani akuzohet për një krim të tillë. Ai vrau dhe plagosi shumë njerëz, gjë që më prek thellë”, tha fqinji.
Sulmi ndodhi gjatë një prej kohërave më të ngarkuara të tregut të Krishtlindjeve, i cili tronditi më tej komunitetin lokal. Qytetarët e Magdeburgut, por edhe më gjerë, shprehën tronditjen dhe pikëllimin për këtë ngjarje tragjike.
Autoritetet gjermane po vazhdojnë intensivisht hetimet për të përcaktuar të gjitha rrethanat që çuan në sulmin. Përveç analizës së motiveve, në fokus të hetimeve do të jetë edhe kontrollimi i veprimeve dhe deklaratave të mëparshme të të dyshuarit, për të përcaktuar nëse dështimet në reagimet e mëparshme kanë kontribuar në realizimin e këtij krimi.
Ministri Faeser theksoi se Gjermania do të mbetet e vendosur në luftën kundër çdo forme të ekstremizmit dhe urrejtjes, duke theksuar nevojën për të forcuar mbikëqyrjen dhe parandalimin e personave potencialisht të rrezikshëm.
