Gruaja britanike e presidentit të rrëzuar sirian Bashar al-Assad, Asma al-Assad, ka bërë kërkesë për divorc pasi shprehu pakënaqësinë me jetën e saj në Moskë, raportuan dje mediat turke dhe arabe, duke shtuar se ajo thuhet se dëshiron të transferohet në Londër.
Asma iu drejtua gjykatës ruse dhe kërkoi leje speciale për t’u larguar nga Moska. Aplikimi i saj aktualisht është duke u vlerësuar nga autoritetet ruse.
Ajo u martua me Asadin kur ishte 25 vjeç
Asma është një shtetase e dyfishtë britaniko-siriane e cila ka lindur dhe është rritur në Londër, raportoi BBC. Asma u transferua në Siri në vitin 2000 dhe u martua me Asad në të njëjtin vit, në moshën 25 vjeçare.
Edhe pse kërkesa e tij për azil në Moskë u pranua, Bashar al-Assad thuhet se është ende nën kufizime të rënda. Ai nuk lejohet të largohet nga Moska ose të përfshihet në ndonjë aktivitet politik.
Autoritetet ruse kanë ngrirë gjithashtu asetet dhe paratë e tij. Pasuritë e tij përfshijnë 270 kilogramë ar, 2 miliardë dollarë dhe 18 apartamente në Moskë.
Familja e Asadit
Vëllai i Bashar al-Assad, Maher al-Assad, nuk ka marrë azil në Rusi dhe kërkesa e tij ende po shqyrtohet, sipas mediave saudite dhe turke. Maher dhe familja e tij janë nën arrest shtëpiak në Rusi.
Assad u rrëzua në fillim të dhjetorit gjatë një ofensive nga forcat rebele të udhëhequra nga grupi Hay’at Tahrir al-Sham (HTS). Megjithëse HTS është regjistruar si një organizatë terroriste nga Shtetet e Bashkuara, SHBA vendosi të anulojë shpërblimin prej 10 milionë dollarësh për kokën e udhëheqësit të HTS, Abu Mohamad al-Jolani.
Familja e Asadit ka qenë në pushtet për më shumë se 50 vjet në Siri.
