Organizata për Siguri dhe Bashkëpunim në Evropë (OSBE) ka shprehur shqetësimin e saj në lidhje me mos-certifikimin e Listës Serbe nga Komisioni Qendror i Zgjedhjeve (KQZ) i Kosovës.
Në një postim të bërë në faqen e saj zyrtare të Facebook-ut, OSBE ka theksuar se “Komisioni Qendror i Zgjedhjeve ka luajtur një rol kyç në përkrahjen e demokracisë dhe lirisë politike në Kosovë për dekada, me mbështetje të qëndrueshme nga OSBE.”
Përmes këtij postimi, OSBE u shpreh se procesi i certifikimit është një “çështje procedurale që mbështet zgjedhjet demokratike dhe duhet të jetë i pastruar nga konsideratat politike.”
Kjo organizatë kërkoi që “procesi i certifikimit të jetë i ndarë nga çdo ndikim politik dhe të sigurohet që çdo vendim për të mos certifikuar kandidatë të bazohet vetëm në zbatimin e barabartë të ligjit.”
OSBE bëri thirrje për transparencë dhe respektimin e parimeve demokratike, duke theksuar se “është e rëndësishme që procesi zgjedhor në Kosovë të jetë gjithëpërfshirës dhe në përputhje me standardet më të larta demokratike, për të ruajtur integritetin dhe besimin e qytetarëve në zgjedhje.” /Kosovatimes/
