Kryetari i Lidhjes Demokratike të Kosovës (LDK), Lumir Abdixhiku, së bashku me bashkëshorten e tij, Albinën, morën pjesë në pritjen solemne të organizuar nga Ipeshkvi i Dioqezës Prizren-Prishtinë, Imzot Dodë Gjergji, me rastin e Festës së Krishtlindjes. Ceremonia u mbajt në ambientet e ngrohta të Qendrës “BogdaniPolis” në Katedralen Shën Nënë Tereza në Prishtinë.
Me këtë rast, Abdixhiku përcolli urimet e tij dhe të LDK-së për të gjithë besimtarët e krishterë që kremtojnë këtë festë, duke theksuar rëndësinë e paqes, dashurisë dhe bashkimit.
“Uroj që kjo Krishtlindje t’i gjejë familjet tuaja të mbushura me paqe, dashuri dhe begati; që momentet e kësaj feste të jenë një kujtesë e rëndësisë së bashkimit dhe mirësisë mes nesh,” deklaroi Abdixhiku.
Ai shtoi se Krishtlindja duhet të shërbejë si një moment reflektimi për të ndriçuar rrugën drejt një të ardhmeje më të mirë për vendin tonë. Në fund, Abdixhiku uroi për një fundvit të mbushur me shpresë dhe për një vit të ri që sjell ndryshime pozitive për të gjithë qytetarët e Kosovës.
Gëzuar Krishtlindjet nga të gjithë ne në LDK! përfundoi Abdixhiku mes urimeve festive dhe atmosferës së ngrohtë në Prishtinë. /Kosovatimes/
