Menaxheri i programeve në Institutin Demokratik të Kosovës, Eugen Cakolli tha se ka qenë e pritur që Lista Serbe do ta ushtrojë ankesën për vendimin e KQZ-së, vendim i cili sipas tij ka qenë i motivuar politikisht.
“Ka qenë më se e qartë se do të anulohet meqenëse i njëjti nuk ka pasur bazë ligjore që të mbetet në fuqi. Në këtë drejtim vlenë të përmendet fakti se edhe vet disa prej antarëve të cilët kanë votuar kundër certifikimit, apo kanë abstenuar e kanë bërë të qartë gjatë ditës së djeshme se ky vendim mund të ankimohet dhe fitohet si rast në Panelin Zgjedhor për Ankesa dhe Parashtresa “, tha ai në një intervistë në emisionin ” Info Plus” në RTK.
Sipas tij, kjo tregon më së miri se ky ka qenë vetëm një vendim politik i pa bazuar në ligj dhe se tashmë do ta privojë KQZ-në nga vendimmarrja e përgjithshme mbi çështjen.
“Nëse ndiqet precedenti ligjor i krijuar nga vet PZA-i në vitin 2019 kur në atë kohë ishin mbajtur zgjedhjet e jashtëzakonshme për kryetarët e katër komunave veriore ka pasur një situatë të ngjashme kur KQZ-ja për shkak të mungesës së votave nuk e kishte certifikuar asnjërin prej kandidatëve të Listës Serbe. Rrjedhimisht, pas ankesës së këtij subjekti politik rasti ishte fituar në PZAP dhe në atë kohë pastaj KQZ-ja nuk kishte pasur fare nevojë të votojë për këtë çështje duke qenë se e njëjta ishte konsideruar e përmbyllur si e tillë.Unë besoj se ky do të jetë skenari edhe në tastin e tanishëm”, sqaroi ai.
Megjithatë ai pëfrseriti se diskursi i krijuar dje në KQZ bashkë me vendimin janë politike për shkak se kriteret ligjore përmbajnë vetëm katër elemente ligjore.
“Në vend të parë subjekti politik duhet të jetë i regjistruar e që Lista Serbe është .Në vitin 2023 kur ka pasur reformë zgjedhore as që është diskutuar mundësia që si kriter për regjistrim të jetë edhe funksioni dhe respektimi i kushtetutshmërisë së Kosovës ndonëse e njëjta nënkuptohet si e tillë. Së dyti është që e njëjta të ketë statut e program i cili nuk bie ndesh me normat kushtetuese dhe prapë edhe në këtë rast Lista Serbe në statutin dhe dokumentet tjera nuk përmban denominime të tilla dhe e fundit duhet që të dërgohen nënshkrimet e që në rastin e kësaj liste meqenëse kanë fituar mandate nuk ju duhet as kjo”, shtoi ai.
Cakolli tha se në kuptimin ligjor Lista Serbe i ka plotësuar kriteret .” Pastaj interpretimet tjera për kryetarin e kësaj partie, ndërlidhjen e ish nënkryetarit me sulmin terrorist që është duke u zhvilluar një proces ndaj tij, mirëpo jo kundër Listës Serbe si subjekt politik. Pra, nuk ka pasur as akuza, as procedurë gjyqësore në raport me Listën Serbe. Rrjedhimisht pa u vërtetuar këto, Listës Serbe nuk mund t’i pamundësohet garimi në këto zgjedhje”, nënvizoi ai.
