Kryeministri Albin Kurti është deklaruar rreth ftesës që Prokuroria Speciale i ka dërguara tij si dëshmitarë në një çështje penale që po hetohet. Ai tha se nuk mund të merret paradite e pasdite me këtë çështje, por tha se do të merret atëherë kur prokurorët do të shkojnë për ta intervistuar në kryeministri.
Tha se është i gatshëm, i hapur, i vullnetshëm dhe i interesuar që të jap deklaratën e tij si dëshmitar dhe për këtë u ka ofruar disa orare atyre meqë kjo nuk është hera e parë që ndodhë një gjë e tillë sepse, sipas tij edhe në të kaluarën prokuroria e shtetit ka intervistuar kryeministra në Qeverinë e Republikës së Kosovës.
“Ekziston komunikimi ndërmjet kryeministrisë dhe prokurorisë dhe të ju them të drejtën nuk mund të merrem paradite, pasdite, për ditë me këtë çështje. Unë do të merrem atëherë kur do të vijnë në kryeministri të më intervistojnë si dëshmitar. Jam i hapur, jam i gatshëm, jam i vullnetshëm e interesuar që në kryeministri të jap deklaratën time si dëshmitar, siç kanë kërkuar. Meqenëse kjo gjë është bërë edhe në të kaluarën dhe ekzistojnë konfirmimet për këtë edhe në kryeministri, i di edhe vetë prokuroria, atëherë unë kam ofruar disa orare kur kjo do të mund të bëhej dhe po pres që me këtë çështje të merrem pikërisht duke dëshmuar dhe jo duke deklaruar mbi dëshminë e cila nuk po ndodhë”, tha Kurti.
Sipas tij, prokuroria e di shumë mirë për çfarë rastesh bëhet fjalë.
“Rastet nuk është se unë i kam shumë të qarta, por këshilltarët e mi ligjorë dhe Ministria e Drejtësisë i di të gjitha këto, por prokuroria e di më mirë se gjithë ne së bashku, se ka pasur raste në të kaluarën kur nga Prokuroria e Shtetit kanë ardhur për të intervistuar kryeministra në Qeverinë e Republikës së Kosovës dhe unë besoj që prej kësaj praktike nuk është se do të duhej të dalim”, tha kryeministri.
