Shkruan: Florim ZEQA
Komisioni Qendror Zgjedhor (KQZ) nuk e ka certifikuar Listën Serbe, pas shqetësimeve të ngritura nga përfaqësues të partisë në pushtet, Lëvizjes Vetëvendosje, se kjo parti nuk e njeh shtetin e Kosovës, dhe atij nuk i referohet me emrin zyrtar, por si “Kosova dhe Metohia”!
Po e marrim se gjithçka është në rregull! Por, pse kryeministri i vendit Albin Kurti shkon në dialog dhe takohet kudo e kah do me Presidentin e Serbisë i cili nuk e njeh shtetin e Kosovës dhe atë e konsideron si pjesë të Serbisë duke e quajtur njëjtë, “Kosovo e Metohija”!
Mos certifikimi i Listës Serbe nuk është zgjidhja, por krijimi i problemeve akoma më të mëdha për veriun e vendit në të ardhmen e afërt!
Ndaj këtij vendimi të ‘Qeverisë Kurti’, më “falni” KQZ-së kanë reaguar Shtetet e Bashkuara, Bashkimi Evropian dhe Gjermania, të cilat kanë shprehur shqetësim dhe keqardhje për moscertifikimin e Listës Serbe – partisë më të madhe të serbëve në Kosovë.
“Procesi i certifikimit duhet të bëhet mbi baza të standardeve ligjore dhe procedurave në përputhje me ligjet, dhe jo në bazë shqyrtimesh politike”, ishte përgjigja e BE-së.
SHBA-ja u ka bërë thirrje të gjitha partive që nuk janë të kënaqura me vendimet e KQZ-së, që t’iu drejtohen mekanizmave adekuatë, sikurse Panelit Zgjedhor për Ankesa dhe Parashtresa (PZAP).
Mosçertifikimi i kësaj partie është pjesë e parafushatës zgjedhore të partisë në pushtet, e cila nuk është duke zgjedhur mjete për të fituar mbështetjen e gjerë popullore!
Një gjë duhet ta dinë dhe kuptojnë mirë qytetarët e Kosovës, se me moscertifikimin e Listës Serbe nuk evitohen problemet në veri, përkundrazi, ato do të shtohen akoma më shumë.
Moscertifikimi i Listës Serbe dhe certifikimi njëkohësisht i tre subjekteve tjera serbe, jo vetëm që nuk e garanton stabilitetin politik në vend, nuk e garanton ‘moderimin’ e tyre, përkundrazi mund të vjen në Kuvend një subjekt tjetër akoma më radikal sesa Lista Serbe!
Ku ishte Albin Kurti më 2022, kur pjesëtarë të kësaj partie patën dhënë dorëheqje në mënyrë kolektive nga institucionet e Kosovës, si shenjë kundërshtimi ndaj vendimeve të autoriteteve të Kosovës për shtrirje të autoritetit në gjithë territorin e vendit?
Pse nuk ia mori mandatet politike Listës Serbe në Kuvend, por e lejoj me bojkot të gjatë që t’i marrin pagat e majme dhe t’i gëzojnë të gjitha privilegjet e deputetit deri në fund të mandatit politik?
Kjo çfarë po bën tani Albin Kurti vërtetë është e pandershme ndaj qytetarëve të vendit, të cilëve po mundohet t’ju hedh “hi syve” me kinse patriotizmin e tij dhe gjuhën populiste në prag të fushatës zgjedhore!
Me moscertifikim e Listës Serbe, KQZ-ja e ndikuar nga Kurti, më shumë e ka ndihmuar Vuçiçin në këtë kohë trazirash politike në Serbi sesa që e ka dëmtuar Listën Serbe.
E ardhmja e afërt do ta vërtetoj këtë konstatim timin analitik.
