Me rastin e vdekjes së ish-kryetarit të Gjykatës Supreme të Kosovës, Rexhep Haxhimusa, homazhe bënë koleg, miq, e familjarë.
Në mbledhjen komemorative për t’i dhënë lamtumirën e fundit dhe për të nderuar jetën dhe veprimtarinë profesionale të tij, prezentë ishin personalitete të ndryshme.
“Rexhep Haxhimusa e udhëhoqi Gjykatën Supreme me guxim në përudhën më të vështirë, atë të ndërtimit të institucioneve. Ai besonte se drejtësia është një e drejtë universale e cila mbrohet me vendosmëri dhe pa kompromis”, ka thënë Fejzullah Rexhepi, kryetari aktual i Gjykatës Supreme.
Gjyqtari Fejzullah Hasani e vlerësoi të ndjerin si “jurist briliant, menaxher unik, një mik i pashoq”.
“Kryetari Rexh e udhëhoqi Gjykatën Supreme dhe gjithë gjyqësorin e Kosovës pasi kishim dalë nga lufta, me dëme të mëdha. Sistemi i drejtësisë dhe institucionet tjera filluan punën nga zeroja. Kryetari Rexh arriti ta ngritë në këmbë sistemin e drejtësisë në këmbë duke e konsoliduar në çdo aspekt”, ka thënë Hasani.
Telegrame ngushëllimi në këtë mbledhje komemorative kanë dërguar Këshilli Gjyqësor i Kosovës dhe Komuna e Ferizajt.
“Modestia e tij dhe dashuria e pakusht për njerëzit që kishte përreth ishin cilësi që e karakterizonin. Gjithmonë jepte nga vetja për të mirën e tjerëve”, tha i biri Yll Haxhimusa.
Rexhep Haxhimusa ka pasur edhe funksione të tjera si avokat, ish-zëvendës prokuror në vitet e 66-ta në Ferizaj, krytear në gjykatën komunale në vitet e 70-ta dhe kryetar i Komisionit të Jurisprudencës në vitin 2010.
