Zhvillimi i kultivimit të perimeve në ambiente të mbrojtura i cili aktualisht po ndodhë në vazhdimësi në vendin tonë, sipas ekspertëve bujqësor po vlerësohet një e mirë dhe zhvillim më profesional i bujqësisë në Kosovë. Duke i parë kërkesat në tregun vendor dhe atë të jashtëm për rukollën e egër dhe marmullën si bimë gjethore, bujqit në vend kanë nisur shtimin e hapësirave për këto bimë.
Kultivuesit e këtyre bimëve thonë se shtimi i kultivimit të rukollës po ndodhë në saje të kërkesave të konsumatorë dhe njëkohësisht sasisë së madhe të importit të kësaj kulture nga vendet evropiane.
Vedat Haradinaj, nga fshati Stanovc i Vushtrrisë thotë se këtë bimë kishte filluar ta kultivonte më seriozisht në vitin 2018.
“Aktualisht posedojmë rreth një hektarë ambiente të mbrojtura ku kultivojmë kryesisht perime gjethore. Llojin e rukollës që e kultivojmë është ajo e njohur në popull me emrin rukolla e egër. Arsyeja e kultivimit të kësaj bime është se në vendin tonë, kërkesat për të janë më të larta”, thotë Haradinaj për emisionin ‘Toka’ në RTK.
Sipas tij, kjo bimë sa i përket kultivimit nuk dallon nga perimet tjera gjethore, porse ndryshimi është se ajo gjatë tërë vitit vilet deri në 4 herë nga një mbjellje.
“Mbjellja e rukollës në ambiente të mbrojtura mund të kryhet pothuajse në tërë sezonin. Vjelja nga koha e mbjelljes kryhet për një kohë realtivisht të shkurtër. Me përjashtim të dorës së parë që duhet të pritet 35 ditë”, thotë ai.
Krahas rukollës, Vedat Haradinaj ,është prodhues serioz edhe i marullës. Ai thotë se Marullën ka filluar ta kultivojë nga viti 2003.
Në anën tjetër, eksperti i bujqësisë, Besim Sahiti, thotë se shtimi I kultivuesve të rukollës po ndodhë në saje të kërkesave të konsumatorë dhe njëkohësisht sasisë së madhe të importit të kësaj kulture nga vendet evropiane.
“Rukolla, shquhet për përmbajtje më të lartë të vitaminave dhe të materieve minerale të rëndësishme për organizmin e njeriut. Po ashtu kjo kulturë është më rezistente ndaj sëmundjeve dhe dëmtuesve për dallim nga perimet tjera gjethore.”, thotë Sahiti pëe emisionin ‘Toka’ në RTK
Ai thotë se kohëve të fundit, fermerët kanë filluar të përcjellin me profesionalizëm trendët e nevojave të konsumatorit dhe zhvillimit të bujqësisë.
“Lajm tjetër i mirë është që tashmë me prodhim të marullës në vend mbulohen të gjitha kërkesat e konsumatorit vendor. Po ashtu, përparësitë e kultivimit të perimeve gjethore janë edhe ciklet e shumta të vjeljes së tyre brenda një viti”, thotë Sahiti.
Zhvillimi i kultivimit të perimeve në ambiente të mbrojtura i cili po ndodhë në vazhdimësi në vendin tonë, sipas Sahitit është një e mirë dhe zhvillim më profesional i bujqësisë në Kosovë.
“Për të arritur një kultivim të suksesshëm brenda ambienteve të mbrojtura, krahas farës cilësore, kushteve agroteknike të mbjelljes dhe mënyrave profesionale të të ushqyerit, fermerët duhet të kenë parasysh mirëmbajtjen profesionale të mikroklimës së ambientit”, thotë Sahiti.
Ai shprehet se përkundër rritjes së mjediseve me ambiente të mbrojtura, ende ka vend për shtim të tyre, porse siç thotë ai, bazike duhet të jetë diversifikimi i kulturave që bujqit në vend i mbjellin.
