Ministri ultra-nacionalist i Sigurisë i Izraelit erdhi në mjediset e xhamisë Al-Aksa të Jerusalemit për, siç tha ai, “të lutet” për pengjet në Gaza, duke vënë edhe një herë në pikëpyetje rregullat që rrethojnë një nga vendet më të ndjeshme në Lindjen e Mesme.
Qëndrimi zyrtar i Izraelit është se ai pranon rregulla dekadash që kufizojnë lutjet jomuslimane në vend, vendi i tretë më i shenjtë i Islamit, të cilin hebrenjtë e quajnë Mali i Tempullit dhe e nderojnë sepse aty kishte një tempull nga kohët biblike.
“Lutja për fitore të plotë me ndihmën e Zotit”
Sipas një marrëveshjeje të vjetër me autoritetet myslimane, Al Aksa menaxhohet nga një fondacion fetar jordanez dhe sipas rregullave të vjetra, hebrenjtë mund ta vizitojnë atë, por nuk mund të luten atje.
“Unë arrita sot në vendin tonë të shenjtë në lutje për mirëqenien e ushtarëve tanë, për kthimin e shpejtë të të gjithë pengjeve dhe një fitore të plotë me ndihmën e Zotit”, shkroi ministri i linjës së ashpër të Sigurisë Itamar Ben-Gvir në rrjetin social X.
Postimi përfshinte gjithashtu një foto që tregonte Ben-Gvir duke ecur nëpër një zonë në majë të kodrës në Qytetin e Vjetër të Jerusalemit, por nuk kishte foto apo video të tij duke u lutur.
Ka reaguar Kryeministria
Zyra e kryeministrit Benjamin Netanyahu lëshoi menjëherë një deklaratë duke përsëritur qëndrimin zyrtar të shtetit izraelit.
Grupi militant palestinez Hamas rrëmbeu rreth 250 njerëz në sulmin e tij në Izraelin jugor më 7 tetor 2023, duke vrarë 1200 njerëz, sipas shifrave izraelite. Në luftën që pasoi në Gaza, forcat izraelite kanë vrarë mbi 45,300 palestinezë, sipas zyrtarëve shëndetësorë në enklavën e drejtuar nga Hamasi.
Propozimet e ultranacionalistëve izraelitë që Tel Avivi mund të ndryshojë rregullat në territorin e xhamisë kanë shkaktuar përleshje të dhunshme me palestinezët në të kaluarën.
Në gusht, Ben-Gvir përsëriti kërkesën e tij që hebrenjtë të lejohen të luten atje, gjë që çoi në kritika të ashpra.
