Departamenti i Matematikës në Universitetin e Prishtinës ka reaguar publikisht ndaj devijimeve nga misioni fillestar i Shoqatës së Matematikanëve të Kosovës, duke shprehur shqetësimin për jotransparencën dhe dyshimet për keqpërdorime të fondeve.
Në një deklaratë të detajuar, Departamenti theksoi se Shoqata, që nga themelimi në vitin 2008, ka luajtur një rol thelbësor në avancimin e matematikës në vend dhe në integrimin e komunitetit në rrjetet ndërkombëtare. Suksese si anëtarësimi i Kosovës në Olimpiadën Matematike Ndërkombëtare dhe Shoqatën Evropiane të Matematikës, organizimi i konferencave shkencore dhe promovimi i matematikës ishin realizuar falë punës ekipore dhe vullnetare të viteve të para.
Megjithatë, Departamenti shprehu indinjatë ndaj një ndryshimi të dukshëm në drejtimin e Shoqatës, e cila, sipas tyre, tani favorizon individë me konflikte interesi. Kuvendi i fundit i Shoqatës, i mbajtur më 23 dhjetor 2024, është cilësuar si i paligjshëm dhe jo transparent. Ndër parregullsitë e raportuara përfshihen: Mungesa e raportit të detajuar financiar dhe e listës së anëtarëve; Proces i mbyllur që pengoi kandidaturat e reja dhe Rizgjedhje e kryetares dhe Këshillit Drejtues me vetëm 30 nga 65 anëtarë.
Gjithashtu, janë ngritur dyshime për pagesa të paligjshme të mijëra eurove ndaj anëtarëve të Këshillit Drejtues, përfshirë kryetaren dhe koordinatorin për gara. Këto shkelje të Statutit, të paarsyetuara në asnjë nga tri mbledhjet e Kuvendit të Shoqatës gjatë këtij viti, kanë shtyrë Departamentin të ndërmarrë hapa konkretë.
Masat e ndërmarra nga Departamenti i Matematikës; Kërkesë për autoritetet shtetërore që të hetojnë keqpërdorimet e dyshuara; Rishikim të bashkëpunimit me Shoqatën nga institucionet publike dhe Ngrirje të bashkëpunimit të Departamentit me Shoqatën deri në rivendosjen e transparencës dhe e profesionalizmit.
Departamenti i Matematikës duke e cilësuar këtë situatë si shqetësuese për komunitetin akademik dhe shkencor, theksoi se mbështet një ristrukturim të Shoqatës në përputhje me misionin e saj të parë, për të siguruar një të ardhme të drejtë dhe transparente për matematikën në Kosovë. /Kosovatimes/
