Kryetari i komunës së Drenasit, Ramiz Lladrovci, dje ka mbajtur tubimin e dytë me publikun, ku raportoi para qytetarëve punën njëvjeçare të këtij viti, ku edhe kumtoi lajmin se Drenasi sërish rangohet i pari në Grantin e Performancës.
Sipas njoftimit të kësaj komune tubimi u mbajt në Sallën e Kuvendit dhe morën pjesë, nënkryetari i Komunës, Arben Shala, drejtorë të drejtorive komunale, administratorë të vendbanimeve si dhe qytetarë të shumtë.
Temë diskutimi e këtij tubimi me publikun, ishin aktivitetet e komunës të cilat janë kryer gjatë këtij viti.
Fillimisht, fjalë hyrëse pati udhëheqësi i Zyrës për Komunikim me Publikun, Bekim Dobra, i cili tregoi rëndësinë e këtij takimi duke shtuar se “Tubimi me publikun ka karakterin informues për pjesëmarrësit mbi të arriturat dhe vështirësitë si dhe investimet kapitale gjatë këtij viti”.
Ndërsa sa i përket punës një vjeçare ka prezantuar kryetari i Komunës, Ramiz Lladrovci, i cili fillimisht falënderoi të pranishmit për pjesëmarrje dhe njëherësh falënderoi administratorët e vendbanimeve për bashkëpunimin me ekzekutivin për t’ju dal në ndihmë qytetarëve, projekteve të nivelit qendror e lokal, me propozimet, vërejtjet dhe sugjerimet gjatë tërë vitit.
Tutje kryetar Lladrovci, në mënyrë të detajuar paraqiti të arriturat, vështirësitë, aktivitetet si dhe projektet e realizuara nga drejtoritë komunale gjatë këtij viti.
“Sfidë tejet të madhe gjatë këtij viti kemi pasur mosfunksionimin e Kuvendit të Komunës për më shumë se katër muaj, si dhe mjetet financiare që janë tërhequr nga thesari përmes formës përmbarimore në zbatimin e kontratës kolektive”, ka thënë kryetari Lladrovci.
Të pranishmit i parashtruan pyetje dhe sugjerime ekzekutivit për punën një vjeçare, ndërsa kryetari Lladrovci i falënderoi për sugjerimet e dhëna si dhe u dha përgjigje të gjithë atyre që adresuan pyetje rreth projekteve të përfunduara gjatë këtij viti, por edhe projekteve në të ardhmen.
Për fund, kryetari Lladrovci uroi të pranishmit si dhe të gjithë qytetarët e komunës së Drenasit, festat e fundvitit, duke ju dëshiruar gjithë të mirat në jetë. /Kosovatimes/
