Trajneri i Chelsea-s, Enzo Maresca pas humbjes nga Fulhami, ka thënë se skuadra e tij nuk është gati për fituar titullin e kampionit në Premier League.
‘Blutë’ e Londrës të enjten u mundën nga Fulhami (1-2), duke bërë një hap prapa në garën për kreun e tabelës.
Maresca pas ndeshjes tha se është turp për mënyrën se si u mposht skuadra e tij në finish të kësaj sfidë.
“Është një turp, veçanërisht me mënyrën se si e humbëm lojën në minutën e fundit”, ka thënë Maresca.
“Mund ta kishim menaxhuar më mirë ndeshjen, ta kontrollonim më mirë, por mund të mësojmë diçka. E kemi thënë disa herë që jemi skuadër shumë e re, por gjëja më e rëndësishme është të shohim lojtarët të rriten dhe të përmirësohen. Nga e shtuna do të përgatitemi për ndeshjen e së hënës”.
“E kam thënë shumë herë që nuk ka rëndësi nëse fitojmë apo jo ndeshje, për shumë arsye nuk jemi gati për të fituar titullin. Më e rëndësishmja është të shohim skuadrën të përmirësohet”, ka theksuar Maresca.
Chelsea mbetet në pozitën e dytë me 35 pikë, shtatë më pak se lideri i tabelës, Liverpool.
