Qeveria e Kosovës ka miratuar ndarjen e njëhershme nga 100 euro për përfituesit e shtesave për fëmijë dhe për pensionistët. Kryeministri Albin Kurti këtë e quajti si përkushtim të qeverisë në kohën kur Kosova pati rritje ekonomike.
“Siç ju kemi njoftuar bashkë me ministrin Murati, Qeveria është përkushtuar që atëherë kur kemi rritje ekonomike e të hyra buxhetore të shpërndahen tek ata që kanë më së shumti nevojë. Mbështetjen shtesë të njëhershme do ta marrin edhe të gjithë pensionmarrësit”, tha Kurti.
Ndërkaq vartësi i tij, ministri Hekuran Murati ka treguar se do të jenë rreth 700 mjë përfitues të shumës së njëhershme 100 euro për këtë vit, fëmijë e pensionistë.
Ai ka sqaruar se përfitues të kësaj shumë do të jenë edh etë gjitha skemat përfshirë edhe kategoritë e luftës e kategoritë e aftësive të kufizuara.
“Prezantoj edhe në formën juridike propozim-vendimin e ndarjes së shtesave në vlerë prej 100 euro për të gjithë përfituesit e shtesave për fëmijë dhe 100 euro për të gjithë përfituesit e skemave pensionale. Të gjitha skemat janë të përfshira edhe kategoritë e luftës edhe kategoritë e aftësive të kufizuara. I vetmi kusht dhe kriter është se nuk mund të përfitojë dikush që është përfitues i më shumë se njërës skemë. Mjetet tashmë janë ndarë me vendime të mëhershme të qeverisë, bëhet fjalë përreth 700 mijë përfitues që do të përfitojnë nga këto shtesa gjë që është një mbështetje voluminoze”, tha Murati.
