Instituti Kombëtar i Shëndetësisë Publike të Kosovës ka konfirmuar për Radio Kosovën rastin e parë me “Linë e Majmunëve”. Drejtoresha e IKSHPK-së, Ardita Baraku, i tha Radio Kosovës se më 26 dhjetor, Laboratori i Mikrobiologjisë ka konfirmuar një rast të importuar të Mpox, i njohur më parë si lia e majmunëve. I infektuari, një 30 vjeçar, ishte kthyer nga një shtet i Afrikës Perëndimore.
Në Kosovë është konfirmuar rasti i parë i infektimit me “linë e majmunëve”. Lajmin e ka bërë të ditur për Radio Kosovën Ardita Baraku, drejtoreshë e Institutit Kombëtar të Shëndetësisë Publike të Kosovës. Ajo tha se, dje në orët e pasdites, nga Laboratori i Mikrobiologjisë në IKSHPK është konfirmuar rasti i parë me këtë sëmundje.
“Po, Instituti Kombëtar i Shëndetësisë Publike të Kosovës ka njoftuar se me datën 26 dhjetor 2024 në orët e pasdites Laboratori i Mikrobiologjisë përmes metodës RT-PCR ka konfirmuar një rast të importuar të Mpox, i njohur më parë si Lia e majmunëve” tha ajo.
Drejtoresha e Institutit Kombëtar të Shëndetësisë Publike theksoi se personi i infektuar është mashkull dhe shtetas i Republikës së Kosovës. Ajo shton se gjendja e pacientit është stabile dhe u bën thirrje qytetarëve për të treguar vëmendje të shtuar.
“Pacienti është spitalizuar në Klinikën Infektive në QKUK, dhe është ne gjendje stabile. IKSHPK i ka gjurmuar të gjitha kontaktet e deklaruara të personit të infektuar dhe të familjarëve të tij, të cilëve u janë dhënë rekomandimet për masat e parandalimit dhe të kontrollit të infeksionit. I ftoj qytetarët për vëmendje të shtuar. Nuk ka vend për panik por të ketë vetëm vigjilencë të rritur”, tha Baraku.
Sipas IKSHPK-se, personi i infektuar pas kthimit nga një shtet i Afrikës Perëndimore, ka pasur simptoma si temperaturë, ethe, ndryshimet në lëkurë, në fytyrë, në duar si dhe kruarje.
Baraku, fton qytetarët që të ndjekin rrjetet sociale të Institutit Kombëtar të Shëndetësisë Publike të Kosovës për t’u mbajtur të informuar.
Ndërkaq, Shërbimi Spitalor Klinik dhe Universitar i Kosovës ka njoftuar se nga të dhënat që janë marrë nga vet pacienti, rezulton se ai ka qëndruar për 4 muaj në Afrikën Perëndimore, një zonë me rrezik të lartë për infeksion me M-Pox (Monkeypox). Aktualisht, ai po trajtohet në përputhje me protokollet ndërkombëtare dhe ndodhet jashtë rrezikut për jetë. Ndërsa një punonjës shëndetësor që ka pasur kontakt të drejtpërdrejtë me pacientin është izoluar dhe po diagnostikohet, kurse gjendja e tij është stabile.
