Telekomi i Kosovës ka renditur punët që kanë bërë gjatë vitit 2024 duke e quajtur si vit të ndryshimeve më të mëdha në këtë institucion. Thonë se operuan me fitim dhe ndalën siç e kanë quajtur ata hemorragjinë financiare.
“Edhe përkundër vështirësive, për shkak se dy herë na janë bllokuar llogaritë bankare, për gati 6 muaj, si rrjedhim i vendimeve gjyqësore të padrejta, të ndërlidhura me kontrata të shumë viteve më parë, megjithatë trendi i përmirësimit të gjendjes financiare të kompanisë, ka vazhduar pandalshëm përgjatë vitit 2024” , thuhet në përmbledhjen që telekomi ka zgjedhur t’ua përcjellë medieve në formë të shkruar e jo në një konferencë për media.
Si të arritura kanë renditur ndërrimin e plotë të teknologjisë mobile të vjetruar me teknologji të fjalës së fundit, fillimin e investimeve të reja në rrjetin fiks, konsolidimin financiar. Formësimin dhe funksionalizimin e strukturës së re organizative. Ofrimin e pakove të reja televizive, të shërbimeve me zë dhe të internetit.
Tutje thuhet se Telekomi i Kosovës si shoqëri aksionare ka bërë përparime përmes teknologjisë së avancuar.
“Modernizimi teknologjik i rrjetit mobil VALA, përfundimi i modernizimit të rrjetit mobil VALA, tash me mbulueshmëri 5G në 72% të territorit të banuar dhe shpejtësi deri në 1Gbps nëpër qytetet e Kosovës. 98.5% e territorit të banueshëm të Kosovës mbulohet me teknologjinë 4G/4G+ për shërbime të shpejta dhe të qëndrueshme. Zgjerimi i rrjetit Fiks. Nisja e projektit për zgjerimin dhe modernizimin e rrjetit optik në mbarë Kosovën, duke siguruar shërbime të internetit brezgjerë dhe përmbajtje televizive më të mira. Rritje të të ardhurave me 5.18%, krahasuar me periudhën e njëjtë, janar-nëntor, të vitit 2023. Fitimi neto u rrit me 16%, duke arritur në 7 milionë euro”, thuhet tutje në këtë përmbledhje nga Telekomi i Kosovës.
Kanë shprehur optimizmin se viti 2025 do të jetë vit i daljes nga kriza përfundimtare si pasojë e vendimmarrjeve që i kanë quajtur të gabuara dhe kontratave të dëmshme. “Në vitin 2025 do të keni në shërbimin tuaj një operator publik të përkushtuar dhe konkurrues”, thuhet në komunikatë. /Kosovatimes/
