Shkruan: Florim ZEQA
Edhe pse në rrethanat e krijuara zgjedhjet nuk do t’na sjellin zgjidhje dhe asnjë dyshim, viti 2025-të do të jetë vit i bujshëm zgjedhor në Kosovë. Edhe pse zgjedhjet nuk do të paraqesin ndryshim të situatës politike në Kosovë, ato do të prodhojnë edhe disa figura të reja dhe të ricikluara në Parlamentin e Kosovës.
“Cosa Nostra”-t e Kosovës
Politika është shndërruar vetëm në betejë për pushtet dhe secila parti që vjen në pushtet, fokusohet në forcimin e klientelave, zhvatjen e popullit dhe shërbimin e plotë per mafio-oligarkët, e assesi për mirëqenien e qytetarëve.
Të gjitha partitë politike, pa dallim, luftojnë me të gjitha mjetet që ta marrin pushtetin fillimisht në nivelin qendror më 9 Shkurt 2025 dhe në vjeshtën e po të njëjtit vit edhe në nivelin lokal ekskluzivisht për interesa personale dhe përfitime materiale e kriminale në shërbim të mafio-oligarkëve të nivelit të lartë, të shndërruar në “Cosa Nostra” të Kosovës.
Pra, aq shumë janë bastarduar partitë politike aktuale, të degraduara dhe të inkriminuara, sa që vetëm një reformim i thellë i tyre mund të krijojë premisat e ndryshimit real përmes proceseve zgjedhore.
E thashë pikërisht kështu, për faktin se pa filtrimin nëpër disa procese të rregullta zgjedhore nuk mund të reformohen partitë tona politike dhe as të ndryshoj përbërja e skenës politike.
Skena politike me këta politikanë dhe me këto parti politike, si në pozitë ashtu edhe në opozitë e kanë katandisur Kosovën në një shtet pa perspektivë, në një shtet tërësisht në duart e krimit të organizuar, përkatësisht të në duart e mafio-oligarkëve politikë dhe ekonomik.
Si pasojë e kësaj situate të zymtë, qytetarët të vetmen shpresë po e kanë (përmes lëvizjes së lirë) që të gjejnë mënyra për të ikur sa me shpejtë sa më larg nga Kosova.
Prandaj, në një situatë të tillë, kur krimi i organizuar dhe nëntoka udhëheqin në të dyja nivelet e qeverisjes, jo vetëm se nuk ka perspektivë për qytetaret, zgjedhjet e reja nuk do të sjellin gjë tjetër, përpos vazhdimësisë dhe riciklimit të figurave politike nga njëra parti në tjetrën, përkatësisht nga njëri nivel i qeverisjes në tjetrin.
Pas dështimit në nivelin qendror, ngritën në nivelin lokal
Kandidatët e privilegjuar për deputet nga të gjitha partitë pa dallim pushtet dhe opozitë, të cilët nuk arrijnë të bëhen deputet, do të caktohen si kandidatë për kryetarë të komunave. Kjo bëhet për të ruajtur ndikimin grupet e interesit brenda partive, e assesi për të mirën e qytetarëve.
