Në prag të përmbylljes së vitit, qytetarët e Gjilanit dhe Anamoravës përballen me mungesën e energjisë elektrike për mbi 30 orë, duke qëndruar në terr dhe të ftohtë. Një situatë që ka thelluar ndjeshëm zhgënjimin e banorëve ndaj qeverisë qendrore dhe lokale.
Lutfi Haziri, një nga figurat kryesore të LDK-së në rajon, e ka cilësuar këtë situatë si një dështim total të menaxhimit të komunës dhe të qeverisë. Ai theksoi se Gjilani, dikur një shembull i investimeve dhe zhvillimit, tani po përballet me varfëri energjetike dhe mungesë të kujdesit institucional.
“Në vend që të kemi mirëseardhje të ngrohtë për bashkatdhetarët tanë, qyteti ynë ofron vetëm terr dhe të ftohtë. Dekorimet dhe dritat në shesh janë një kontrast i dhimbshëm me realitetin në shtëpitë e qytetarëve,” deklaroi Haziri.
Ai akuzoi qeverinë qendrore dhe komunale për mungesë totale të përgjegjësisë, duke vënë theksin te mosinvestimet dhe përjashtimi i Gjilanit nga prioritetet qeveritare. “Terri dhe i ftohti kanë rritur depresionin politik dhe ekonomik, një barrë që qytetarët nuk e meritojnë,” shtoi ai.
Ndërkohë, në të njëjtën mbrëmje, qeveria qendrore ka organizuar një event festiv në Gjilan me titull “Kënaqësi n’fundvit.” Sipas Hazirit, ky aktivitet do të shndërrohet në një shfaqje të hapur të pakënaqësisë qytetare ndaj qeverisjes së deritanishme.
“Fundvit në terr për Gjilanin, një vit i humbur dhe një mandat i dështuar,” përfundoi Haziri duke bërë thirrje për reflektim dhe përgjegjësi nga institucionet.
Ky fundvit, për shumë gjilanas, përveç mungesës së dritave dhe ngrohjes, simbolizon edhe mungesën e shpresës për një menaxhim më të mirë në të ardhmen. /Kosovatimes/
