Ish-futbollisti i kombëtares ruse Alexey Bugaev vdiq në luftën në Ukrainë. Ish-mbrojtësi ka lidhur kontratë me Ministrinë e Mbrojtjes për të mos vuajtur dënimin prej 9.5 vitesh të vendosur nga gjykata për tentativë trafik droge.
Kanë kaluar tre muaj nga vendimi i shtatorit deri në vdekjen e futbollistit 43-vjeçar. Vdekjen e djalit të tij e ka konfirmuar për Sport24 më 29 dhjetor babai i futbollistit, Ivan Bugaev.
Alexey Bugaev është pjesëmarrës në Kampionatin Evropian 2004, ai është i diplomuar në “Torpedo” të Moskës, ka luajtur për “Lokomotiv”, “Tom” dhe “Krasnodar”, në 2005 ka fituar Superkupën e Rusisë me Lokomotiv.
Bugaev e përfundoi karrierën e tij në moshën 29-vjeçare. Në nëntor 2023, ai u arrestua me akuzën e tentativës për trafik droge. Mësohet se ai u ndalua me 495 gramë mefedron. Mbrojtja këmbënguli se policia falsifikonte provat. Por në gjyq, ish-futbollisti tha se e pranoi fajin dhe u pendua. Avokati i tij më pas deklaroi se Bugaev ishte “me nxitim për të shkuar në Qarkun Ushtarak Verior”.
