Aksidentet ndodhën në harkun e vetëm pesë ditëve në mbarë botën, nga Kazakistani, përmes Norvegjisë dhe Kanadasë deri te aksidenti më tragjik në Korenë e Jugut.
Fluturimi i Azerbajxhanit Airlines 28243 (25 dhjetor 2024)
Ditën e Krishtlindjes, një aeroplan i Azerbajxhanit Airlines u rrëzua pranë Aktaut, Kazakistan, pasi raportohet se u godit nga sistemet kundërajrore ruse teksa po përpiqej të ulej në Grozny, kryeqyteti i Çeçenisë. Fluturimi J2-8243, gjatë rrugës nga Baku në Grozny, u devijua pasi avioni ra nën zjarr, me sistemet ruse të mbrojtjes ajrore që dyshohet se kanë ngatërruar një aeroplan civil si një kërcënim për shkak të bllokimit elektronik të GPS.
Në aeroplan ndodheshin 67 pasagjerë dhe anëtarë të ekuipazhit, 38 prej të cilëve humbën jetën. Mes viktimave kishte shtetas të Azerbajxhanit, Rusisë, Kazakistanit dhe Kirgistanit. 29 persona mbijetuan falë përpjekjeve heroike të ekuipazhit. Kapiteni Igor Kshnyakin, bashkë-piloti Aleksandar Kalayaninov dhe stjuardesa Hokuma Aliyeva u shpërblyen pas vdekjes për guximin e tyre.
Rrëzimi i avionit në Kazakistan (Foto: Reuters)
Incidenti shkaktoi tensione të mëdha politike midis Azerbajxhanit dhe Rusisë. Presidenti Ilham Aliyev akuzoi Moskën se po përpiqet të “mbulojë të vërtetën” dhe i kërkoi Rusisë të marrë përgjegjësinë e plotë, të ndëshkojë fajtorët dhe të paguajë dëmshpërblim. Presidenti rus Vladimir Putin kërkoi falje, duke deklaruar se avioni u godit gjatë operacioneve kundër dronëve ukrainas, por nuk pranoi drejtpërdrejt përgjegjësinë.
KLM Flight 1204 (28 dhjetor 2024)
Fluturimi holandez KLM, i cili mbante 176 pasagjerë dhe gjashtë anëtarë të ekuipazhit nga Norvegjia në Holandë, përjetoi një incident gjatë një ulje emergjente në aeroportin Sandefjord Torp, 110 kilometra nga Oslo. Për shkak të një mosfunksionimi në sistemin hidraulik, avioni doli nga pista pas uljes, duke u ndalur në një zonë me bar. Fatmirësisht nuk ka pasur të lënduar, por pasagjerët dhe ekuipazhi janë evakuuar ndërsa ka nisur hetimi.
Një aeroplan i Pal Airlines nga Kanadaja, në një fluturim nga St. John’s në Halifax, pësoi një incident gjatë uljes për shkak të një problemi me pajisjen e uljes. Njëra prej rrotave nuk ka zbritur siç duhet, duke bërë që avioni të rrëshqasë poshtë pistës në një kënd prej 20 gradë. Me atë rast motori ka marrë flakë, por falë reagimit të shpejtë të ekuipazhit dhe shërbimeve të urgjencës, të gjithë pasagjerët dhe anëtarët e ekuipazhit janë evakuuar në mënyrë të sigurtë.
Jeju Air Flight 2216 (29 dhjetor 2024)
Ngjarja më tragjike e javës ka ndodhur në Korenë e Jugut, ku një avion Jeju Air është rrëzuar teksa po ulej në Muan. Fluturimi 7C2216, me 181 persona nga Bangkok, u përplas me murin e aeroportit pasi pësoi një dështim mekanik të shkaktuar nga një goditje zogu, sipas raporteve paraprake.
Avioni po përpiqej të ulej në mot të ashpër kur ekuipazhi raportoi një goditje të mundshme zogu në krahun e djathtë, duke bërë që kontrollorët e fluturimit ta devijonin atë në një drejtim tjetër uljeje. Pavarësisht përpjekjeve të pilotit, avioni u rrëzua në pistë pa u aktivizuar pajisjet e uljes, rrëshqiti me shpejtësi të madhe dhe goditi murin e aeroportit. Pasuan shpërthime të fuqishme, duke përfshirë në flakë pjesën më të madhe të avionit.
Foto: Reuters
Në aksident humbën jetën 179 persona, mes tyre pesë fëmijë, ndërsa mbijetuan vetëm dy anëtarë të ekuipazhit. Një nga të mbijetuarit, një stjuardesë, u gjet në pjesën e bishtit të avionit dhe aktualisht është në gjendje të rëndë. Ky është rrëzimi më i rëndë i avionit në historinë e Koresë së Jugut.
Dëshmitarë të shumtë e përshkruan skenën si të tmerrshme. Një pasagjer, i cili pak para aksidentit i dërgoi një mesazh një të afërmi të tij, i shkruante: “Zogu ka ngecur në krah, nuk mund të aterojmë”. Banorët lokalë pranë aeroportit thanë se dëgjuan një “shpërthim të fortë dhe një seri shpërthimesh” ndërsa avioni u përplas me një mur dhe u dogj.
Më shumë se 1,500 punëtorë shpëtimi, duke përfshirë zjarrfikës dhe policë, morën pjesë në operacionin e shpëtimit dhe kërkimit. Pavarësisht kushteve të vështira, janë gjetur mbi 88 trupa, ndërsa identifikimi i pjesës tjetër vijon. Familjet e të ndjerit u mblodhën në aeroport, ku u vendosën tenda për një lamtumire private. Tingujt e të qarit jehonin nëpër terminal ndërsa zyrtarët lexonin emrat e viktimave.
Foto: Reuters
Qeveria e Koresë së Jugut ka shpallur shtatë ditë zie. Linjat ajrore vendase dhe ndërkombëtare shprehën ngushëllimet e tyre, ndërsa prodhuesi i avionëve Boeing njoftoi bashkëpunim të plotë në hetim. Kjo tragjedi tregoi seriozitetin e pasojave të mundshme të përplasjeve me shpendët, por edhe rëndësinë e trajnimit shtesë të pilotëve në menaxhimin e krizave.
Katër incidente, dy prej të cilave përfunduan me një numër të madh viktimash, e lanë të tronditur industrinë e aviacionit. Ndërsa familjet mbajnë zi për të dashurit e tyre, autoritetet e aviacionit në mbarë botën po analizojnë çdo aspekt të aksidenteve për të parandaluar ngjarje të ngjashme në të ardhmen.
