Të paktën 60 njerëz vdiqën në Etiopi kur një kamion plot me pasagjerë u zhyt në një lumë, thanë autoritetet në rajonin jugor të Sidama.
Aksidenti ka ndodhur në lagjen Bona, thuhet në njoftimin e zyrës rajonale të komunikimit të lëshuar mbrëmë vonë. “Ata që mbijetuan tani po trajtohen në Spitalin e Përgjithshëm Bona”, thuhet në njoftim, pa dhënë detaje.
Transmetuesi shtetëror EBC raportoi se pasagjerët po udhëtonin për në një martesë kur aksidenti ndodhi dje. Aksidentet rrugore fatale janë të zakonshme në Etiopi, ku standardet e drejtimit janë të dobëta dhe shumë automjete nuk mirëmbahen mirë.
Të paktën 38 persona, kryesisht studentë, vdiqën në vitin 2018 kur një autobus ra në një luginë në veriun malor të Etiopisë.
