Komuna e Prishtinës ka arritur të shfrytëzojë mbi 80% të buxhetit dhe ka realizuar 63% të investimeve kapitale. Kryetari i Prishtinës, Përparim Rama, vlerësoi këtë si një arritje historike dhe rezultat i një pune të palodhur, pavarësisht bllokadave dhe sfidave të hasura gjatë vitit. Opozita vazhdimisht ka kritikuar për mosrealizimin e projekteve madhore.
Kryetari i kryeqytetit, Përparim Rama, tha se për herë të parë në historinë e vet, komuna ka shfrytëzuar mbi 80% të buxhetit dhe ka realizuar 63% të investimeve kapitale.
“Kjo është dëshmi e një pune të palodhur, përkundër çdo bojkoti, bllokade dhe sfide që kemi hasur rrugës”, tha Përparim Rama, kryetar i Prishtinës.
Sipas Ramës, pas këtij suksesi qëndrojnë drejtorët e kryeqytetit. “E di që ende kemi shumë për të bërë, por vizioni ynë është i pandalshëm: do t’ia kthejmë këtij qyteti shkëlqimin, dinjitetin dhe shpirtin e tij unik. Ky është zotimi ynë ndaj jush, dhe do ta realizojmë”, tha ai.
Megjithatë, me zhvillime të ndryshme është karakterizuar kryeqyteti përgjatë 2024-ës. Shkurti shënoi edhe prishjen e koalicionit mes LDK-së e PDK-së në Prishtinë, ku si rrjedhojë pozita humbi shumicën e më këtë u shkarkua edhe kryesuesi i kuvendit komunal nga radhët e LDK-së, Pëllumb Bajqinovci, për t’u zgjedhur më pas në këtë pozitë Fehmi Kupina.
Rama nuk arriti t`i krijojë numrat për planin zhvillimor komunal, sikurse i siguroi ata për miratimin e planit urbanistik për Kalabrinë.
Edhe për miratimin e buxhetit për vitin 2025, mezi u siguruan numrat. E opozita, gjatë gjithë vitit adresoi kritika ndaj pushtetit në kryeqytet për mosrealizim të projekteve të mëdha, për mbeturinat, qentë endacakë e komunikacionin e ngarkuar.
