Kryetari i Partisë FJALA, Gëzim Kelmendi, ka reaguar ashpër ndaj deklaratave të Kryeministrit Albin Kurti, të publikuara nga “The New York Times,” ku ai ka thënë se feja nuk ka qenë kurrë parësore për identitetin shqiptar dhe se fetë kanë ardhur e shkuar, por populli shqiptar ka mbetur këtu.
Kelmendi e cilësoi këtë deklaratë si skandaloze dhe të papranueshme, duke e quajtur një ndër më të ulëtat nga një kryeministër që përfaqëson një shtet me shumicë myslimane.
“Kjo lloj deklarate mund të vijë vetëm nga një lider me bindje ateiste dhe ideologji marksisto-leniniste,” tha Kelmendi, duke shtuar se këto qëndrime janë fyese dhe nënçmuese për identitetin fetar të popullit të Kosovës.
Ai gjithashtu kritikoi Kurtin për mungesën e reagimit ndaj gjuhës fyese të disa aktivistëve të “Lëvizjes së Deçanit” ndaj Fesë Islame, duke akuzuar Kryeministrin për përbuzje të hapur ndaj fesë.
Kelmendi rikujtoi qëndrimet e tij të hershme kundër politikave të Vetëvendosjes, duke thënë se që nga viti 2017 ka paralajmëruar për qasjen e rrezikshme të Kurtit ndaj fesë. Ai përmendi se për këtë ka përjetuar sulme dhe ofendime nga deputetë dhe militantë, disa prej të cilëve tashmë janë larguar nga VV-ja.
Reagimi i Kelmendit ka ngjallur debat të gjerë në opinionin publik, duke thelluar diskutimet mbi raportin e politikës me fenë në Kosovë. /Kosovatimes/
