Manchester City e ka nisur vitin 2025 me një fitore bindëse 4-1 ndaj West Ham United në ndeshjen e zhvilluar në “Etihad Stadium”, në kuadër të Javës së njëzetë në Premier League.
Protagonisti kryesor i këtij triumfi ka qenë Savinho, i cili ka shkëlqyer me performancën e tij.
City e ka zhbllokuar rezultatin që në minutën e dhjetë, kur Savinho ka shënuar pas një devijimi të topit nga Vladimir Coufal, duke e lënë portierin Alphonse Areola në pamundësi për të reaguar. Pavarësisht epërsisë së hershme, vendasit janë detyruar që të mbroheshin me kujdes gjatë pjesës së parë, pasi West Ham ka kërcënuar me disa kundërsulme të rrezikshme, por pa arritur të konkretizonte asnjë prej tyre.
Në minutën e dyzet e dytë, Erling Haaland e ka dyfishuar epërsinë për City me një goditje të saktë me kokë pas një krosimi nga Savinho.
Dyshja ka bashkëpunuar përsëri në fillim të pjesës së dytë, kur Haaland ka realizuar golin e tretë pas një pasimi të saktë të Savinhos, duke e kaluar topin me këmbën e majtë mbi Areola.
Situata për West Ham dhe trajnerin Julen Lopetegui është rënduar më tej në minutën e pesëdhjetë e katërt, kur Phil Foden ka përfituar nga një gabim në mesfushë dhe e ka çuar topin mes këmbëve të portierit Areola për të shënuar golin e katërt.
Niclas Fullkrug e ka shënuar një gol për West Ham në minutën e shtatëdhjetë e një, në një moment kur rrjedha e ndeshjes nuk mund të ndryshohej.
Pas kësaj fitore, Manchester City gjendet në vendin e gjashtë në renditje, ndërsa West Ham në vendin e trembëdhjetë. Tabela e Premier League vazhdon të kryesohet nga Liverpool.
