Kryeministri i Kosovës, Albin Kurti, ka vijuar takimet me qytetarët në kuadër të përmbylljes së mandatit të tij të parë. Mbrëmjen e djeshme, ai vizitoi Gjakovën, ndërsa sonte qëndroi në Mitrovicë, duke nënvizuar simbolikën e këtyre dy qyteteve në historinë e Kosovës.
“Gjakova ka pësuar më së shumti gjatë luftës, kurse Mitrovica ka pësuar më së shumti pas luftës. Në përmbyllje të mandatit tonë të parë, Mitrovica është më e plotë se asnjëherë më parë prej çlirimit dhe më e gatshme për të vazhduar rrugëtimin e ndryshimit,” deklaroi Kurti.
Ai theksoi arritjet e qeverisë në fusha si ekonomia, drejtësia, bujqësia, shëndetësia dhe siguria, duke garantuar përkushtim për zhvillim të mëtejshëm pas zgjedhjeve të 9 shkurtit 2025.
Kurti falënderoi qytetarët për mikpritjen në Teatrin “Muharrem Qena” në Mitrovicë, që është rinovuar tërësisht nga Ministria e Kulturës. Ai gjithashtu njoftoi se pas një jave do të rikthehet në qytet për një tjetër takim në Sallën e Sporteve “Minatori”. /Kosovatimes/
