Paris Saint-Germain ka fituar Superkupën e Francës, “Trophee des Champions”, pasi ka mposhtur Monaco me rezultat 1:0 në një ndeshje të zhvilluar të dielën mbrëma në Doha të Katarit.
Golin e fitores e ka shënuar Ousmane Dembele në kohën shtesë, duke i dhënë PSG-së triumfin e njëmbëdhjetë në dymbëdhjetë edicionet e fundit të këtij trofeu.
Ndeshja ka nisur me një ritëm të ngadaltë, ku PSG kishte më shumë posedim. Skuadra e kryeqytetit u afrua për ta hapur rezultatin brenda dhjetë minutave kur Desire Doue thuajse shfrytëzoi një gabim të Philipp Kohn, por goditja e tij është pritur nga shtylla. PSG ishte dominues në pjesën e parë dhe përsëri është afruar për të kaluar në epërsi kur Dembele ka kaluar dy mbrojtës dhe e ka detyruar një intervenim të mirë nga portieri i Monaco, Kohn.
Monaco e ka testuar Gianluigi Donnarummën pesë minuta para pushimit, por portieri italian ka bërë një ndalje të sigurt për të mohuar një mundësi të Maghnes Akliouche.
Pas pushimit, të dy ekipet kanë kërkuar golin e fitores, duke tentuar të mbyllnin ndeshjen brenda nëntëdhjetë minutave. Monaco ka qenë më afër, pasi Vanderson e ka goditur shtyllën.
Pasi ndeshja ka kaluar në një periudhë më të ngadaltë, dukej sikur të dy skuadrat kishin pranuar se ndeshja mund të shkonte në kohë shtesë. Pesëmbëdhjetë minuta para përfundimit, Achraf Hakimi e ka humbur një mundësi të shkëlqyer, kur gjuajtja e tij nga pozita afër shtyllës është ndalur nga portieri i Monacos.
Megjithatë, Dembele nuk ka pranuar një barazim. Ai ka shënuar në kohën shtesë, duke përfituar nga një pasim i Fabian Ruiz dhe duke shtyrë topin drejt rrjetës, për të siguruar trofeun për PSG-në.
