INDONEZIA i është bashkuar grupit BRICS të ekonomive të mëdha në zhvillim, njoftoi presidenca braziliane, duke theksuar kontributin “pozitiv” të Xhakartës në bashkëpunimin e “Jugit Global”.
BRICS pranoi kërkesën e Indonezisë për anëtarësim qysh në vitin 2023, në një samit në Johannesburg, por Xhakarta vonoi anëtarësimin zyrtar në grup deri në zgjedhjet presidenciale në 2024 dhe formimin e një qeverie të re.
Një vend me 280 milionë banorë
Indonezia është tani një anëtare e plotë e BRICS, njoftoi sot Brasilia.
Indonezia ka 281.1 milionë banorë dhe renditet e katërta në botë. Është ekonomia më e madhe në Azinë Juglindore dhe është në vendin e dhjetë në renditjen e ekonomive kryesore në botë, e matur me barazinë e fuqisë blerëse, sipas të dhënave nga Banka Botërore.
Ajo ka arritur “progres të jashtëzakonshëm në uljen e varfërisë”, me shkallën e varfërisë më shumë se përgjysmuar që nga viti 1999 dhe pak më e ulët se 10 për qind në 2019, para pandemisë së koronavirusit, thekson Banka Botërore.
Në pandemi, shkalla e varfërisë ishte rritur me 10.2 për qind për shkak të dëmeve të mëdha në ekonomi dhe në korrik 2023, Indonezia përsëri zuri vendin e saj në grupin e vendeve me të ardhura të mesme të larta, me një shkallë varfërie prej 9.36 për qind.
Organizata për Bashkëpunim dhe Zhvillim Ekonomik (OECD) vlerësoi në fillim të dhjetorit se Indonezia ka kaluar Kinën në vitin 2024 me një normë rritjeje të vlerësuar prej 5.1 për qind. Ata duhet të shënojnë një rezultat më të mirë edhe këtë vit, sipas normës së parashikuar të rritjes prej 5.2 për qind.
