RRETH 52% e ukrainasve i besojnë Presidentit Volodymyr Zelensky, një rënie prej shtatë pikë përqindjeje krahasuar me tetorin 2024 dhe 12 pikë përqindjeje në krahasim me shkurtin, sipas një sondazhi të ri nga Instituti Ndërkombëtar i Sociologjisë në Kiev (KIIS) i publikuar sot.
Nga ana tjetër, 39% e të anketuarve kanë thënë se nuk i besojnë presidentit. Sondazhi, i kryer midis 2 dhe 17 dhjetorit të vitit të kaluar, vjen pasi lufta totale e Rusisë po i afrohet tre vjetorit të saj dhe forcat ruse vazhdojnë të përparojnë në Ukrainën lindore.
Besimi te Zelenskyi, i cili ishte përballur me rënien e popullaritetit përpara shkurtit 2022, u rrit pasi Rusia nisi pushtimin e saj dhe presidenti qëndroi në Kiev për të udhëhequr rezistencën ukrainase, treguan sondazhet e mëparshme të KIIS.
Rënia e popullaritetit filloi vitin e kaluar
Shifrat filluan të bien në vitin 2024, pasi stanjacioni në fushën e betejës i la vendin përparimeve taktike ruse, megjithëse shumica e ukrainasve ruajtën besimin e tyre te Zelensky gjatë gjithë vitit.
Zelenskiy shihet më mirë në rajonet perëndimore (60%) dhe qendrore (52%) të vendit, dhe më pak në rajonet jugore (46%) dhe lindore (42%). Jugu dhe lindja e Ukrainës ishin më të prekurat nga lufta ruse. Rezultatet e hulumtimit bazohen në intervistat telefonike me 2000 të anketuar që jetojnë në territoret e kontrolluara nga Ukraina.
Gjithnjë e më shumë njerëz janë gati për lëshime territoriale për paqe
Hulumtime të tjera sociologjike të kohëve të fundit tregojnë një rritje të moderuar, por të qëndrueshme të pesimizmit në mesin e popullatës ukrainase ndaj përparimit të luftës. Në një tjetër anketë të KIIS nga dhjetori 2024, rreth 38% e të anketuarve thanë se ishin të hapur ndaj koncesioneve territoriale në këmbim të paqes, një rritje e konsiderueshme nga 19% një vit më parë.
Pritjet për bisedimet e mundshme të paqes në vitin 2025 po rriten pasi presidenti i zgjedhur i SHBA-së, Donald Trump ka premtuar të sjellë Kievin dhe Moskën në tryezën e bisedimeve, megjithëse mbetet e paqartë se si ai planifikon ta bëjë këtë.
