Kryeministri i Kosovës, Albin Kurti, ka zhvilluar një takim me qytetarët e Podujevës për të prezantuar arritjet e qeverisë në fusha kyçe, duke përfshirë diplomacinë dhe imazhin ndërkombëtar, sigurinë dhe sundimin e ligjit, mbrojtjen dhe ushtrinë, ndërmarrësinë dhe tregtinë, si dhe bujqësinë dhe prodhimin.
Kurti kujtoi rolin e veçantë të Llapjanëve si “lajmëtarët e ndryshimit” në zgjedhjet e 14 shkurtit 2021 dhe shprehu bindjen se më 9 shkurt ata do të udhëheqin sërish drejt fitoreve të reja.
“Llapjanët kanë qenë prijësit e ndryshimit dhe besoj se do të jenë të tillë edhe këtë herë, duke mbështetur qeverisjen e drejtë dhe shërbimin ndaj qytetarëve,” tha Kurti.
Kryeministri njoftoi gjithashtu një tjetër takim në Llap më 15 janar, duke ftuar qytetarët të jenë pjesë e këtij angazhimi për të ardhmen e përbashkët. /Kosovatimes/
