Berat Rukiqi, anëtar i kryesisë së Lidhjes Demokratike të Kosovës (LDK), ka kritikuar ashpër politikën administrative të Qeverisë aktuale, duke e ilustruar me një shembull konkret për absurditetin e procedurave.
Ai theksoi se, në rast se kompania gjigante Tesla vendos të regjistrohet në Kosovë, themeluesi i saj, Elon Musk, do të duhej të paraqitej fizikisht në një sportel të një ministrie për një nënshkrim të vetëm.
“Kjo është pasojë e vendimeve të gabuara të kësaj Qeverie, që nuk po arrin të modernizojë administratën dhe ta përshtatë atë me standardet e vendeve perëndimore,” tha Rukiqi.
Ai shtoi se kjo lloj burokracie po pengon ardhjen e investitorëve të huaj, të cilët kërkojnë një proces të shpejtë dhe të thjeshtë për të regjistruar kompanitë e tyre. Sipas tij, një reformë urgjente në këtë drejtim është jetike për të tërhequr investime serioze dhe për të ndërtuar një mjedis më të favorshëm për bizneset. /Kosovatimes/
