Sot rreth orës 15:00, në fshatin Shushicë, në rrugën Istog-Rakosh, ka ndodhur një aksident i rëndë trafiku ku janë përfshirë katër vetura.
Policia e Kosovës ka konfirmuar se nga ky aksident shtatë persona kanë pësuar lëndime trupore dhe kanë kërkuar ndihmë mjekësore. Sipas mjekut kujdestar, të lënduarit janë jashtë rrezikut për jetë.
“Rreth orës 15:00 policia është njoftuar për një aksident në rrugën Istog-Rakosh në fshatin Shushicë. Në aksident të involvuara janë katër vetura. Shtatë persona janë lënduar dhe kanë kërkuar tretman mjekësor, ku sipas mjekut kujdestar janë jashtë rrezikut për jetë”, tha zëdhënësi i policisë për rajonin e Pejës, Fadil Gashi.
Shkaqet e aksidentit ende nuk janë bërë të ditura, ndërsa ekipet e policisë dhe ekspertiza kanë nisur hetimet për zbardhjen e rrethanave të ngjarjes.
