Përfaqësues të një ndër lagjeve më të mëdha të Prizrenit, asaj të “Bajram Currit”, kanë protestuar para Hidroregjionit Jugor, të pakënaqur me furnizimin me ujë së paku në gjashtë muajt e fundit.
Ata thonë se pa ujë mbesin mbi 10 orë në ditë.
“Ne kërkojmë që reduktimet të hiqen, të kemi ujë të bollshëm për të kryer obligimet qytetarët në lagje”, ka thënë Dashmir Susuri, banor i lagjes “Bajram Curri”.
“Jemi të indinjuar për shkak të ujit, e kisha lut ‘Hidroregjionin’ që të mos na e ndalë ujin, të jemi të barabartë me të gjithë lagjet, jemi diku nga 10 orë 12 orë pa ujë”, ka thënë në anën tjetër banori Nderim Shala.
Selim Buqaj ka thënë se reduktimet do të ishin të pranueshme gjatë sezonit të verës, por jo tani.
“Tash ka shtim të ujit, nuk e di pse na mos me u furnizua me ujë si të gjitha lagjet, pse me pas reduktime të vazhdueshme, hajde koha e thatësirës, gusht shtator jemi të mirëkuptimit, mirëpo tani në këtë kohë kur ka shtim të ujit, kjo nuk është e drejtë”, ka thënë ai.
Një grup nga protestuesit u ftuan nga kryeshefi i kompanisë Hidroregjioni Jugor, Fadil Berisha, për të biseduar për gjendjen aktuale të furnizimit me ujë. Përfaqësuesi i lagjes Pelivan Pulaj tha se kanë marrë premtime nga udhëheqësit e kompanisë se me shtimin e nivelit të ujit në burime, do të ulen edhe reduktimet jo vetëm në këtë lagje, por edhe në pjesë të tjera të qytetit.
Ndërkohë kryeshefi i Hidroregjionit, deklaroi për RTK-në se janë duke monitoruar situatën e ujit në burime dhe se me rritjen e kapaciteteve të ujit, presin të zbusin edhe orarin e reduktimeve në lagjet e Prizrenit.
