Qeveria e Serbisë po bllokohet në vazhdimësi nga protestat e studentëve atje. Ata kërkojnë që të përcaktohet tragjedia në Novi Sad. Protestuesit mbanin në duar parulla por edhe brohoritje kundër qeverisjes së presidentit serb, Aleksandër Vuçiq.
Protestat dhe bllokadat në Beograd vazhdojnë para Pallatit të Drejtësisë, ku studentët e fakulteteve të Beogradit shprehën pakënaqësinë ndaj punës së organeve të drejtësisë. Me fishkëllima kundër pushtetit ata deklaruan se nuk do të ndalen derisa të përcaktohet përgjegjësia për tragjedinë në Novi Sad.
“Presim që kërkesat tona të plotësohen dhe nuk ndalemi tash më shume se një muaj”, thotë një studente.
Të pranishmit mbanin parulla si “Duart i keni të përgjakura”, me brohoritjet kundër presidenti Vuçiq.
Studentët janë të pakënaqur me reagimin e prokurorisë ndaj sulmeve të huliganëve gjatë protestave. Ata theksojnë rëndësinë e drejtësisë dhe paralajmërojnë se do të jenë të bashkuar.
“Është e rëndësishme që ne të rinjtë të jemi aktivë dhe të edukuar politikisht, pavarësisht qëndrimeve ndaj qeverisë. Dhe si reagojnë institucionet është e papranueshme”, tha Petar Gjorgjeviq, student i Fakultetit të Inxhinierisë Elektrike.
Qytetarët kanë dhënë mbështetje për studentët. Midis tyre, edhe qytetarë të moshuar kanë theksuar se besojnë në suksesin e studentëve.
“Kanë plotësisht të drejtë dhe po bëjnë gjithçka si duhet”, thotë një qytetare.
“Të rinjtë duhet mbështetur, ata janë e ardhmja”, thekson një qytetare tjetër.
Protesta vijoi me një bllokadë njëorëshe të Nyjës së Mostarit. Studentët dhe qytetarët qëndruan në këtë kryq i rrugës e rëndësishme si pjesë e autostradës Beograd-Nish, ku shpalosën transparentin e madh “Kërkesat nuk janë plotësuar”. Ata theksuan se kjo simbolizon “nyjën e pazgjidhshme” të Prokurorisë serbe. Qeveria dënoi protestat. Ministrja e Drejtësisë, Maja Popoviq, i quajti ato presion mbi Prokurorinë. Studentët deklaruan se nuk tërhiqen. Protesta e radhës është paralajmëruar për nesër në Novi Sad, përpara BIA-s, ndërsa të dielën para Gjykatës Kushtetuese.
