Kryetari i Prishtinës, Përparim Rama, ka njoftuar sot nënshkrimin e Marrëveshjes për gjobat digjitale të trafikut, një projekt bashkëpunimi me Policinë e Kosovës dhe Postën e Kosovës. Ky hap synon të modernizojë procesin e mbikëqyrjes dhe të rregullimit të trafikut duke reduktuar kundërvajtjet dhe, duke rritur sigurinë në rrugët e kryeqytetit.
Në fjalën e tij, Rama u shpreh se kjo marrëveshje përfaqëson një avancim të rëndësishëm në përpjekjet për të sjellë rregull dhe standarde bashkëkohore në qytet. Ai shtoi se zbatimi i gjobave digjitale jo vetëm që do të lehtësojë procesin e ndëshkimeve për shkeljet në trafik, por edhe do të promovojë një kulturë më të sigurt rrugore për qytetarët.
“Me këtë hap, Prishtina vazhdon të ecë me hapa të shpejtë drejt modernizimit, duke ofruar zgjidhje të reja për sfidat urbane,” deklaroi kryetari.
Kjo nismë është pjesë e projekteve të mëdha të modernizimit të qytetit, që synojnë të përmirësojnë jetën e përditshme të qytetarëve dhe të krijojnë një mjedis më të sigurt dhe funksional për të gjithë përdoruesit e rrugëve. /Kosovatimes/
