Shtëpia e Nue Gashit dhe Stane Gashit apo nëna Stane në fshatin Brus në komunën e Lipjanit gjatë viteve ‘98-‘99 ishte strehë e mbi 300 ushtarëve të UÇK-së, ku ata gjetën ushqim, logjistikë por edhe vend për armatim e konak. Muaj më parë, RTK ka realizuar një reportazh për kontributin e Stane Gashit gjatë periudhës së luftës në Kosovë.
Ishte fjalëpakë, por nënë krenare. Stane Gashi është gruaja që gjatë luftës së fundit në Kosovë në shtëpinë e saj në Brus të Lipjanit mbajti e ushqeu 300 ushtarë të UÇK-së.
Asaj sot iu nda edhe statuja “Hyjnesha në Fron”, si simbol i qëndresës së gruas shqiptare.
Stane Gashi apo siç e quajnë ndryshe Nëna Stane ishte e ftuar në ceremoninë e ndarjes së mirënjohjes nga kryetari i Komunës së Prishtinës, Përparim Rama.
”Për një mirënjohje shumë të thjeshtë që duamë me ta dhënë ne si kryeqytet dhe me të falënderua për çdo gjë që ke bërë për këtë vend e vazhdon të bësh. Kur atdheu thërriste shtëpia juaj u kthye në vatër të luftëtarëve të lirisë, ku ata gjetën jo vetëm ushqim e strehim por edhe nxitjen për të vazhduar luftën. Falë bujarisë suaj të pakursyer fituat epitetin e madh prej popullit si Nëna e Ushtrisë Çlirimtare të Kosovës”, tha Rama.
Statuja “ Hyjneshës në Fron” iu dha asaj si simbolikë e qëndresës së gruas.
