DISA mijëra njerëz u mblodhën në qytetin lindor të Gjermanisë Riesa për të protestuar kundër mbajtjes së një kongresi të partisë së ekstremit të djathtë Alternativa për Gjermaninë (AfD) përpara zgjedhjeve parlamentare më 23 shkurt.
Tre partitë kryesore të Gjermanisë SPD, CSU dhe AfD do të takohen të shtunën për të finalizuar programet e tyre të fushatës dhe për të rënë dakord për kandidatët përpara zgjedhjeve kombëtare. Në Reis, një qytet që ndodhet midis Lajpcigut dhe Dresdenit, protestuesit marshuan drejt ndërtesës ku po mbahet kongresi dy-ditor i AfD, ku partia do të miratojë programin e saj zgjedhor.
Policia tha se pret deri në 10,000 njerëz. Tubimi po vijon i qetë, përveç disa incidenteve të tentativave për të thyer barrikadat, por protesta ka vonuar nisjen e tubimit të partisë.
Sipas informacioneve nga burime të AfD, u ndalua të vinte edhe presidentja e partisë AfD, Alice Weidel, e cila duhet të emërohej kandidatja e partisë për kancelar në konventën dyditore.
Organizatorët njoftuan se forcat e rendit përdorën gaz lotsjellës dhe shkopinj kundër disa grupeve protestuese.
Grupi Widersetzen (Rezistenca), i cili po koordinon tubimin e protestës, tha se “doli në rrugët e Riese sot si një shenjë solidariteti, diversiteti dhe hapjeje”.
Rreth 600 delegatë të AfD-së duhet të emërojnë Alice Weidel si kandidate për postin e kancelares dhe të miratojnë udhëzime për daljen nga BE dhe daljen nga euro. Duhet të miratohet edhe politika e migracionit dhe të sqarohen disa pika të politikës familjare.
Sondazhet sugjerojnë se AfD mund të bëhet partia e dytë më e fortë pas zgjedhjeve të 23 shkurtit, me 18 deri në 21 përqind të votave të parashikuara.
