Presidenti ukrainas Volodymyr Zelensky tha se Kievi është i gatshëm t’i dorëzojë ushtarët e Koresë së Veriut te lideri i tyre Kim Jong-un nëse ai mund të sigurojë shkëmbimin e tyre me ushtarët ukrainas të kapur në Rusi.
“Me ushtarët e parë të kapur nga Koreja e Veriut, sigurisht që do të ketë më shumë. Është vetëm çështje kohe para se ushtarët tanë të arrijnë të kapin edhe të tjerët,” shkroi Zelenski në Xu. Zelensky tha dje se Ukraina ka kapur dy ushtarë nga Koreja e Veriut në rajonin Kursk të Rusisë.
Sipas vlerësimeve të Ukrainës dhe Perëndimit, rreth 11,000 trupa nga Koreja e Veriut ndodhen në rajonin e Kurskut për të ndihmuar forcat ruse. Rusia as e ka konfirmuar e as mohuar praninë e tyre. Zelensky thotë se forcat ruse dhe koreano-veriore kanë pësuar humbje të mëdha.
“Ukraina është e gatshme t’i dorëzojë ushtarët Kim Jong-un nëse ai mund të organizojë shkëmbimin e tyre me luftëtarët tanë të kapur në Rusi,” tha Zelensky. Ai publikoi një video të shkurtër që tregon marrjen në pyetje të dy burrave që paraqiteshin si ushtarë të Koresë së Veriut.
Zelensky tha se mund të ketë opsione të tjera për ushtarët e Koresë së Veriut që nuk duan të kthehen në shtëpi “dhe se atyre që shprehin dëshirën për të sjellë paqen më afër duke përhapur të vërtetën për këtë luftë në gjuhën koreane do t’u jepet ai opsion”. Ai nuk dha detaje.
