Në ditën e tretë të fushatës zgjedhore, Lidhja Demokratike e Kosovës mbajti tubimin elektoral në Kamenicë.
Kandidati për kryeministër nga LDK, Lumir Abdixhiku, prezantoi programin politik për Kamenicën dhe Kosovën. Ai theksoi se ka ardhur koha që Kosova të ndryshojë.
“Zgjedhjet për LDK-në gjithmonë janë festë, jemi këtu drejt rrugëtimit për ndryshim. Kamenica ka qenë gjithmonë simbol i drejtësisë dhe vlerave, ka dhënë shumë për Kosovën dhe pret shumë. Është koha që të bëni ndryshimin tuaj, ju ftoj për kryengritjen e cila ka marrë hov gjithandej si nevojë e shpëtimit të vendit. Autostrada e Anamoravës do të bëhet brenda mandatit qeverisës,” tha ai.
Ai ftoi qytetarët që të votojnë LDK-në për një të ardhme sa më të mirë për ta.
Kandidati për deputet nga Kamenica, Jeton Biqkaj, shpalosi vizionin e tij për të ardhmen e vendit, në krye me LDK-në.
“Duam një Kosovë ku vlera dhe dija të mbizotërojnë. Ndryshimi po vjen dhe ai vjen vetëm me Lidhjen Demokratike të Kosovës dhe me kryeministër, Lumir Abdixhiku. LDK është parti e vlerave dhe parimeve,” tha ai.
Aktivitetet e LDK-së do të vazhdojnë me qytetarët e lagjes “Dardania” në Gjilan.
