Numri i ushtarëve të vdekur dhe të plagosur të Koresë së Veriut në Ukrainë ka tejkaluar ndoshta 3,000, duke përfshirë rreth 300 të vdekur dhe 2,700 të plagosur, tha sot një ligjvënës koreano-jugor, duke cituar informacione nga agjencia e inteligjencës së vendit.
“Duket se autoritetet e Koresë së Veriut kanë ftuar ushtarët e tyre të kryejnë vetëvrasje duke hedhur në erë veten për të shmangur kapjen,” tha ligjvënësi, duke cituar Shërbimin Informativ Kombëtar të Koresë së Jugut (NIS).
Ushtarët e kapur të Koresë së Veriut nuk kanë treguar asnjë qëllim për të ardhur në Korenë e Jugut, megjithëse Koreja e Jugut do të bashkëpunonte me Ukrainën nëse do të kishte një kërkesë, njoftoi gjithashtu agjencia e lajmeve Yonhap, duke cituar NIS. Presidenti ukrainas Volodymyr Zelensky njoftoi të shtunën se Ukraina ka kapur dy ushtarë nga Koreja e Veriut në rajonin Kursk të Rusisë.
Zelenski i dërgoi një mesazh Kim Jong-un
Sipas vlerësimeve të Ukrainës dhe Perëndimit, rreth 11,000 trupa nga Koreja e Veriut ndodhen në rajonin e Kurskut për të ndihmuar forcat ruse. Rusia as e ka konfirmuar e as mohuar praninë e tyre. Zelensky thotë se forcat ruse dhe koreano-veriore kanë pësuar humbje të mëdha.
Dje, ai deklaroi se Kievi është gati t’i dorëzojë ushtarët e Koresë së Veriut te lideri i tyre Kim Jong-un nëse ai mund të sigurojë shkëmbimin e tyre me ushtarët ukrainas të kapur në Rusi. Ai shpjegoi se mund të ketë opsione të tjera për ushtarët e Koresë së Veriut që nuk duan të kthehen në shtëpi “dhe se atyre që shprehin dëshirën për të sjellë paqen më afër duke përhapur të vërtetën për këtë luftë në gjuhën koreane do t’u jepet ai opsion”.
