Oda Ekonomike Amerikane në Kosovë ka shprehur shqetësimin e saj lidhur me sulmet verbale të ditëve të fundit, por edhe ato të vazhdueshme, ndaj ndërmarrjeve private në Kosovë. Ajo kërkon nga institucionet dhe partitë të mbajnë larg diskursit të tyre politik ndërmarësit në vend.
“Duke rikujtuar institucionet e vendit se pikërisht ndërmarrjet private kanë bartur për vite me radhë barrën e punësimit dhe të zhvillimit ekonomik të vendit, Oda Amerikane shpreh shqetësimin se politizimi dhe sulmet ndaj këtyre ndërmarrjeve për qëllime politike janë veprime nga të cilat partitë politike dhe bartësit e institucioneve duhet të përmbahen”, thuhet në reagimin Odës Ekonomike Amerikane në Kosovë.
Oda Amerikane rikujton se ndërmarrjet si Devolli Corporation dhe Devolli Group kanë luajtur një rol të rëndësishëm në transformimin e ekonomisë së Kosovës, duke fuqizuar kapacitetet prodhuese dhe rritur eksportet, duke kontribuar në përmirësimin e bilancit të pagesave të Republikës së Kosovës.
“Ndërmarrjet private janë promovuesit kryesorë të potencialeve dhe interesave ekonomike të Kosovës, përfshirë tërheqjen e investimeve të huaja direkte. Sulmet e vazhdueshme ndaj tyre cenojnë reputacionin e këtyre ndërmarrjeve dhe përkeqësojnë më tej klimën e investimeve në vend, e cila tashmë ka shënuar rënie, siç evidentohet në Deklaratat e Klimës së Investimeve të Departamentit Amerikan të Shtetit”, thuhet tutje në këtë reagim.
Sipas Odës Amerikane, nëse institucionet shtetërore dhe partitë politike nuk janë në gjendje të ofrojnë mbështetje për zhvillimin e mëtejshëm të ndërmarrjeve private, atëherë duhet të shmangin përfshirjen e tyre në diskursin politik. “Në të kundërtën, ato do të mbajnë përgjegjësi për përkeqësimin e treguesve socio-ekonomikë, përshirë cenimin e prospekteve për tërheqjen e investimeve të huaja”, thuhet në këtë reagim.
