Policia e Kosovës përmes një komunikate për media ka njoftuar rreth aksionit të sotëm për ndërprerjen e aktiviteteve të disa institucioneve të jashtëligjshme të cilat vepronin në Kosovë. Kanë thënë se qëllimi i operacionit policor është vendosja e rendit dhe ligjshmërisë, bazuar në kërkesën e Ministrisë së Administrimit të Pushtetit Lokal.
“Policia e Kosovës, sipas detyrës zyrtare dhe autorizimeve ligjore e kushtetuese, angazhohet për ruajtjen e rendit dhe sigurisë publike, ndërmarrjen e masave policore konform situatës dhe zhvillimeve në nivel vendi, përfshirë ofrimin e sigurisë ndaj të gjithë qytetarëve pa dallim. Policia e Kosovës me njësitë e saja relevante, sot në orët e hershme të mëngjesit, në bashkëpunim dhe koordinim me institucionet përkatëse të Republikës së Kosovës, ka realizuar një operacion të gjerë policor, operacion ky i shtrirë në disa rajone të Kosovës: DRP Prishtinë, DRP Gjilan, DRP Gjakovë dhe DRP Mitrovicë Jugu, për ndërprerjen e aktiviteteve të disa institucioneve të jashtëligjshme që vepronin si komuna, posta, banka etj., të cilat ofronin shërbime të jashtëligjshme, kundër rendit kushtetues dhe ligjeve pozitive të Republikës së Kosovës”., thuhet ën komunikatën e Policisë së Kosovës.
Thonë se të gjitha veprimet policore janë realizuar në bashkëpunim dhe koordinim me institucionet kompetente.
“Qëllimi i operacionit policor është vendosja e rendit dhe ligjshmërisë, ku Policia e Kosovës, bazuar në kërkesën e Ministrisë së Administrimit të Pushtetit Lokal, ka asistuar zyrtarët e kësaj ministrie si dhe të Ministrisë së Industrisë, Ndërmarrësisë dhe Tregtisë, për ndërprerjen e aktiviteteve të jashtëligjshme të këtyre institucioneve. Të gjitha veprimet policore janë realizuar në bashkëpunim dhe koordinim me institucionet kompetente, ku varësisht nga të gjeturat do të ndërmerren masat e mëtejme ligjore, në bashkëpunim dhe koordinim me organet e drejtësisë”, përfundon njoftimi policor për aksionin e sotëm.
Më herët gjatë ditës Prokuroria Themelore e Prishtinës ka thënë se nuk ka lëshuar autorizim për bastisjet dhe kontrollet që u kryen sot nga Policia e Kosovës në dhjetë komuna të vendit, për mbylljen e komunave paralele të Serbisë në Lipjan, Obiliq, Prishtinë, Fushë Kosovë, Vushtrri, Novobërdë, Kamenicë, Viti, Rahovec, Skenderaj, si dhe posta e zyre tatimore ilegale.
