Ministri i Administrimit të Pushtetit Lokal, Elbert Krasniqi, ka theksuar se nuk do të duhej të diskutohej se pse institucionet e Serbisë janë mbyllur, por se si ato kanë qenë të hapura deri tash.
Ministri Krasniqi në Facebook, ka shkruar se institucionet serbe të mbyllura të mërkurën në Kosovë, i ka quajtur institucionet paralele kriminale të Serbisë në Kosovë.
“Tashmë janë mbyllur Institucionet paralele kriminale të Serbisë në Kosovë. Komunat paralele, Posta paralele, Administratat Tatimore paralele. Qytetarët e Kosovës, i kanë komunat e Kosovës, Postën e Kosovës si dhe Administratën Tatimore të Kosovës, sikurse të gjitha institucionet e tjera të bazuara në Kushtetutën e Kosovës dhe legjislacionet në fuqi. Diskutimi për institucionet e Serbisë në Kosovë nuk do të duhej të bëhej se pse janë mbyllur sot, por si kanë qenë të hapura deri sot”, ka shkruar Krasniqi.
