Kryetari i Lidhjes Demokratike të Kosovës (LDK), Lumir Abdixhiku, u prit me madhështi nga qytetarët e Junikut gjatë një tubimi entuziast në kuadër të mobilizimit elektoral për zgjedhjet e 9 shkurtit.
Në fjalimin e tij emocionues, Abdixhiku vlerësoi traditën dhe mikpritjen e Junikut duke theksuar se ky qytet i pasur me histori dhe krenari është simbol i qëndresës dhe i atdhedashurisë. “Sonte, në këtë tokë të historisë dhe të guximit, ndjemë mobilizimin e jashtëzakonshëm që po përhapet në çdo cep të vendit. Shpresa dhe vendosmëria për një Kosovë më të mirë janë të gjalla dhe të fuqishme,” deklaroi ai.
Abdixhiku ritheksoi bindjen se ndryshimi është i pashmangshëm dhe se qytetarët e Kosovës janë të bashkuar për një të ardhme më të mirë. “Kur një popull qëndron i bashkuar, nuk ka asgjë që nuk mund të arrihet. Me 9 shkurt do të vulosim këtë ndryshim të madh,” tha lideri i LDK-së.
Ai falënderoi qytetarët e Junikut për përkrahjen e fuqishme, duke përgëzuar edhe Ruzhdi dhe Demokratin për organizimin e këtij eventi madhështor.
LDK po përgatitet fuqishëm për zgjedhjet e 9 shkurtit, duke e cilësuar këtë datë si kthesë historike për të ardhmen e Kosovës. /Kosovatimes/
